Ah’m Pickle. It’s three year sin Ah cam tae bide here. See, Ah’d been snecked-up in the jile fir dugs and cats when they folk took a shine tae me an paid tae get me oot. Ah heard a mannie say 'We have to take his pom-poms aff afore he gaes.' Didnae ken whit that meant! It hurt! But that wis lang syne noo!
Ah'm a wee tabbie wi a white mou an paws. That first day, Ah didnae ken whit tae expect. They pit me in a totty wee cage an pit a kiver ower it. So Ah gaed tae sleep. Whan Ah woke up, we were in a big hoose - so Ah had tae tak a wee look, jist a wee dauner, like. Whan Ah had a guid lang gate aroond, Ah thocht, aye this'll do jist grand.
Pickle? Huh! It's no whit ma mither cried me whan Ah wis a kittlen. Naebody kens that. At least it's no as bad as Pushka. Pushka? He's ma best pal. But posh, ken. Whan we first met, Ah counldnae unnerstaun a wird he said, it wis that la-dee-dah. So we had a lang, slaw dance aroond eachither an then a wee test. A real cat fecht wi nae claws, the like that gies folk watchin the heebie-jeebies. Nae a scart on him or me - an that wis it. Pals fir life.
The lassie who thinks she awns him ca's him "Pushie". Pushie! Ah've niver seen a cat as timorsome as that yin. But he's got her weel trained, jist like Ah hiv ma folk. Guid food on tap - nane o thon cheap stuff, ken! Cumfy places tae sleep. Muckle big gairdens tae play in. An loads o freends. Ah'm kent as the neebourheid cat roond these pairts.
Whit's that? How do Ah pass the time? Weel, Ah hae tae gang oot on ma patrol ivery morn at first licht, rain or shine. I hiv to get ma folk oot their pits jist tae let me oot. Ah gang roond tae Puska's fir a wee bit scran then we both gang oot thegither. It's a tae do wi the smell, ken. That's whit cats live fir.
It's no been easy this past year. Oor folk, cruived up in the hoose wi a that seeknes gaun on. They a look sae happy tae see their freends again.
Sae should Ah jyne them in a celebration? Och aye. Ah suppose ma wee pal an I micht stay oot late. Listen tae the dugs howlin at the moon. Mebbe have a wee feast o a moose... or ten. A neebor has a wee problem wi them. An I guess it's a richt tae celebrate that it’s three year sin Ah cam tae bide here.